دعوه للمؤازره النفسيه

سؤال جيه على بالى كتير بعد ما هديت ثورة الانفعال بمعرفه ورؤيه اللى حصل هناك
فى ناس اقترحوا الاتى
اولا المقاطعه للمنتاجات الامريكيه الصهيونيه
ثانيا الدعاء
ثالثا التبرعات
رابعا نشر الموضوع وتوعية الناس بيه لان فى ناس مش مقدره حجم المصيبه وفى ناس فاهمه الموضوع بشكل تانى
كمثال(مهما ضربوا شرطى مصرى احسن يستهلوا اللى بيحصلهم)
بس يا جماعه الموضوع مش كده تصوروا انكم محبوسين فى مكان ومقفول عليكم المعبر واهاليكم بتتدبح قدامكم هتعملوا ايه فى اللى قافل عليكم ده

خامسا كان فى اقتراح من (د. شريف عرفه طبيب اسنان ورسام كاركاتير)اننا نتصل بارقام عشوائيه فى غزه كنوع من أنواع المؤازره النفسيه
جربته واتصلت برقمين
واحده كانت مش قادره تتكلم وكانت بتقولى ان القصف بيحصل بشكل عشوائى وكان جنبهم من شويه
وحد تانى قلى انهم عايشين فى رعب وكل يوم بيناموا ومش واثقين ان كانوا هيعدى عليهم يوم جديد ولا لاء

للاتصال
* توجه إلي أقرب سنترال أو كابينة تليفون أو من أي تليفون محمول.
* اطلب كود فلسطين (00970) + كود غزة (8).
* اطلب سبعة أرقام بشكل عشوائي علي أن تبدأ بثلاثة أرقام من الأرقام الآتية ( 213 -205 – 206 – 282 – 283 – 284 – 286 )

واحتسب الاجر
الناس اللى كلمتهم متتصوروش كانوا هما اللى بيدعولى رغم انى كنت حاسه بعجز رهيب وانا بكلمهم
مش عارفه اقلهم ايه ولا اساعدهم ازاى بس ممكن يكون ده مؤثر معنويا
وان مكنش هيعملهم حاجه
يلا نتصل قبل ما الخطوط التليفونيه تتقطع زى الكهربا

سادسا تعالوا جميعا نبدأ مع انفسنا بدايه جديده
وتعالوا ننشر الموضوع ونستحضر النيه معا
والله المستعان