رجال صدقوا الله

بسم الله الرحمن الرحيم

(من المؤمنين رجال صدقوا ما عاهدوا الله عليه فمنهم من قضى نحبه ومنهم من ينتظر وما بدلوا تبديلا)

صدق الله العظيم

اردت ا ن اكتب عن واحد من هؤلاء الرجال الذين صدقوا الله وهو الشهيد عز الدين القسام
واسمه بالكامل محمد عز الدين القسام وقد ولد بسوريا فى قرية جبلة عام 1882
وقد جاء الى مصر عام1896 لكى يدرس فى الازهر الشريف ومكث فى مصر حتى عام 1906
وعايش التيارات الاسلامية بمصر وتاثر بها
ثم عاد الى سوريا وشارك فى الثورة السورية التى انتهت بمعركة ميلسون عام 1920
بعد ذلك انتقل الى فلسطين بعد تعاظم الخطر اليهودى واستقر فى مدينة حيفا بعد ان حكم عليه الفرنسيون بالاعدام
اشتغل بالتدريس والخطابة بجامع الاستقلال بحيفا واسس عام 1928 فرع لجمعية الشبان المسلمين ورأسه
ركز جهوده على ثلاثة اهداف وهى :التنبيه الى لخطر اليهودى , والدعوة الى الجهاد , واختيار العناصر واعدادها فكريا وعسكريا
فاثمرت جهوده عن تكوين مجموعات تهاجم اليهود فاغارت على طريق مستوطنة الياجورعام 1931 وقتلت ثلاثة من اليهود لعنهم الله
ثم تتابعت عمليات القسام العسكرية وانتشرت مجموعاته فى المناطق الجبلية
خرج مع ستة من اخوانه الى الجبال بعد ان ضيق عليه الانجليز الخناق فى حيفا عام 1935
واستشهد فى نفس العام مع اثنين من المجاهدين فى معركة يعبد حيث حاصره الانجليز بقوات كبيرة معها المدافع والطائرات
خرج الالوف يحملون جثث الثلاث شهداء بثيابهم المخضبةبالدماء الطاهرة مسافة 5 كم الى المقبرةفى قرية الشيخ
وصلى عليهم الفلسطنيون صلاة الغائب
وقد اتخذ الجناح العسكرى لحركة حماس اسم كتائب عز الدين القسام
رحم الله الشهيد واعان المجاهدين فى فلسطين
وطهر ارض فلسطسن من الخونة والعملاء
واريد ان انوه الى انه عندما اختارت حركة حماس - وفقها الله- هذا الاسم لجناحها العسكرى لم يكن من فراغ
وانما اختارت رمزا جليلا للمقاومة الاسلامية التى تخاف على مقدسات المسلمين ولا تساوم عليها

ذكريات رمضانية

كل سنة وانتم طيبين
رمضان كريم

ويارب يعيده علينا وعلى الامة الاسلامية بالخير واليمن والبركات
وان شاء الله يكون حال المسلمين افضل وتحرر فلسطين من براثن الصهاينة

شهر رمضان الكريم بيهل علينا كل سنة وكلنا بنفرح بيه وبنحاول نستقبله احسن استقبال
واكيد الشهر الكريم بيسيب معانا ذكريات حلوة ومبنحسش بيها الا فى الشهر الكريم
طبعا كلنا اومعظمنا مبيحسش ان رمضان جه الا اذا سمعنا اغنية رمضان جانا للفنان محمد عبد المطلب
الاغنية دى بجد من اروع الاغانى اللى اتعملت ده غير صوت عبد المطلب الجميل

ذكرى تانية مرتبطة معاى انا شخصيا وهى اذان المغرب بصوت الشيخ محمد رفعت فى اذاعة الشرق الاوسط
انا معرفش افطر الااذا سمعت صوت الشيخ محمد رفعت

طبعا الحكومة لازم تسيب ذكرى ليها فى رمضان
بس اكيد ذكرى وحشة مش حلوة
الحكومة متمثلة فى شيخ الازهر ووزير الاوقاف والمفتى لازم يخنقونا ليلة الرؤية
يفضلوا يخطبوا ويهنوا الرئيس ويهنوا بعض وفى الاخر يقولوا رمضان بكره ولا لا
طبعا بيكونوا اتاخروا وتضيع علينا صلاة التراويح فى اول ليلة
بس اليومين دول مفيش حد بيصدقهم والناس بتمشى مع الحسابات الفلكية

صوما مقبولا وافطارا شهيا

بوابة الحلوانى

بسم الله الرحمن الرحيم
لقد قمنا نحن اصحاب مدونات ابوسويلم و بتاع الجاز وتخاريف دكتور ودكتور كسلان وسى السيد
بعمل مدونة جديدة وقد اسميناها بوابة الحلوانى وقمنا بانجازها فى وقت قياسى
نظرا لنشاطى المعهود ومجهوداتى الضخمة

ايه الكلام اللى بقوله ده
م الاخر احنا عملنا مدونة مشتركة واللى عايز يدخل البوابة اهلا وسهلا بيه
بس ادعوا عشان ميتعلموش منى الكسل
ياريت تشرفونا فى مدونتنا الجديدة

ازهى عصور البيروقراطية

بعد اذن السيد صفوت الشريف امين عام الحزب الوطنى ممكن اقتبس العنوان من تعبيره الرئع ازهى عصور الديموقراطية
بس طبعا هو كان بيهجس وبيقول كلام غير الواقع .لان احنا بنعيش ازهى عصور الديكتاتورية
المهم خلينا فى البيروقراطية.بجد احنا بلد بيروقراطى من الدرجة الاولى بلد اختام وطوابع بوسطة
موظفين يبعتوك لبعض وموظف يقولك فوت علينا بكرة يا سيد طبعا دى اشهر جملة سمعناها فى حياتنا
وبتيجى كل يوم فى برنامج همسة عتاب واللى عمره ما حل مشكلة
مش عارف بقيت بتخنق من اى موظف اشوفه-مع احترامنا للموظفين-بس بحس ان فيه موظفين بيحبوا يضايقوا الناس
هو اكيد مش كل الموظفين كده لان فيه موظفين مغلوبين على امرهم ويقولك لومعملتش كده هتضرنا
الحمد لله انى مش بتعامل كتير مع الموظفين لانى لو كنت بتعامل معاهم كتير كان جالى شلل رباعى
انا من خلال موقف او اتنين اتعاملت فيهم مع موظفين كرهت كل الموظفين
انا فاكر ايام الكلية الموظفين فى شئون الطلبة واى موظف فى الجامعة عموما كانوا مثال للبيروقراطية المتاصلة والمتوطنة
كنت مرة بعمل ورق فى الجامعة والموظف قاللى ختم النسر مش واضح روح اخنمه تانى
وعشان يخنق عليا اكتر قاللى انا بقفل الشباك الساعة2 بالظبط ولو جيت بعد كده مش هاخده منك
يعنى مش راضى ياخد الورق وبيعجزنى لو اتاخرت ويقوللى فوت علينا بكرة ياسيد
موقف تانى حصلى اليومين اللى فاتوا عداد الكهربا بتاع البيت عندنا اتحرق وطبعا لازم اروح شركة الكهربا عشان اركب عداد جديد
المهم روحت الشركة واول مادخلت حسيت بانقباض وشعور غريب ودخلت للموظف وقلتله اللى حصل
قاللى لازم تشترى طلب فحص وبعد كده تدفع فى الخزنة ولازم موظف من الشركة هو اللى يفك العداد المحروق
المهم سمعت كلامه على مضض وعملت اللى قاللى عليه
وكسلت يجى اسبوعين ورحتله تانى بالعداد قاللى استنى لما اكتب تقرير وبعد ما كتب التقرير قاللى اطلع امضيه من المدير
وكتر خيره قال لموظف تانى يجى معايا لقيت الموظف التانى خاف وقاللىلا ياعم ده راجل لاسع وبيزعق ع الفاضى والمليان
المهم رحت مضيته من المديرونزلت لقيت الموظف بيقوللى روح ادفع فى الخزنة
هادفع تانى ما انا دفعت المرة اللى فاتت المهم رحت للخزنة لقيت الموظفة بتقوللى استنى شوية
وبعد انتظار يجى ربع ساعة قالتلى لسه فيه امضاء ناقص اطلع امضيه تانى
طلعت مضيته ورجعتلها قالتلى استنى لما انده عليك ولما ندهت عليا قالتلى هات 128.75 جنيه ياسلام ع الدقة
دفعت وامرى الى الله وبعد كل ده هستنى حوالى اسبوعين لما العداد الجديد يتركب
بذمتكو مش حاجة تخنق

من أجل رفع الظلم عن المظلومين

نقلا عن مدونة بحب مصر
http://baheb-msr.blogspot.com

"لازم نعمل حاجة " هذا هو ماشعرت به فى تعليقاتكم على البوست اللى فات يمكن ده فعلا لسان حالنا كلنا لازم نتحرك يوم ورا يوم بيفوت ومفيش جديد فى الموضوع عشان كده قررت ابدأ الحملة حملة للمطالبة بالاعلان عن مكان الطلاب المختطفين حملة من أجل رفع الظلم عن المظلومين حملة نعذر نفسنا بها امام الله حملة من أجل انصر اخاك ظالما او مظلوما .......بس للأسف انا مبعرفش أصمم فوتو شوب وماعنديش غير التصميم ده مناسب (انهم يقتلون فينا حب مصر ) عشان كده ضعه فى مدونتك واللى يعرف يصمم اى تصميم مناسب يراسلنى على الايميل islam.refay@gmail.com

- حاول نشر الصورة فى اكبر عدد من المدونات والمواقع

عايزين نراسل اكبر عدد من الكتاب والاعلاميين

وللاسف فيه اخبار بتؤكد وفاة الطالب محمد على فريد من شدة التعذيب
والد الطالب صرح بكده والخبر ورد فى المصرى اليوم
يارب تكون اخبار كاذبة ولو كانت صحيحة
ندعوا الله ان يغفر للشهيد ويدخله فسيح جناته وان ينتقم من الظالمين شر انتقام

حسبنا الله ونعم الوكيل

الهجوم على سوريا

انا مش عارف ليه كل الهجوم ده على سوريا والانتقادات الكتيرة دى
طبعا مش قصدى الهجوم من جانب امريكا واسرائيل على النظام السورى
انا قصدى الهجوم الموجه من الفنانين المصريين للفنانيين السوريين
ليه كل الغيرة دى من الفنانيين المصريين ده علشان الممثليين السوريين اخدوا ادوار مهمة منهم
او لانهم -السوريين-متمكنيين عنهم حتى باللهجة المصرية
ومن امثلة الهجوم ده: الفنان احمد ماهر انتقد بشدة الفنان جمال سليمان لقيامه ببطولة مسلسل حدائق الشيطان
وكان شايف ان هو يقدريقوم بالدور احسن منه
طبعا استحالة كان يؤدى الدور زيه-مع احترامنا للفنان احمد ماهر- واعتقد ان ده مش رايى لوحدى
وياريت يشوف اداؤه فى المسلسلات السورية زى ملوك الطوائف وعصى الدمع
ومثال اخر : فى تصريح للفنان حسين فهمىللمصرى اليوم قال فيه انه بيتحدى اى ممثل سورى للوقوف امامه فى مشهد واحد
انا بقى اتحدى اى ممثل مصرى انه يقدر يمثل مشهد واحد فى مسلسل تاريخى امام ممثل سورى
الممثلين السوريين متمكنيين جدا من اللغة العربية الفصحى من حيث النطق ومخارج الالفاظ غير تمكنهم من الاداء
انا ادعو الممثلين المصريين انهم يشوفوا المسلسلات التاريخية السورية زى مسلسل الحجاج والظاهر بيبرس وخالد بن الوليد
وافضل دليل على كلامى انهم اختروا الممثل السورى غسان مسعود للقيام بدور القائد العظيم الناصر صلاح الدين فى الفيلم الاجنبى مملكة الجنة
والمتابع للدراما السورية يجد انها تطورت بشكل كبيرجدا فى اخر 10 سنوات
سواء كانت مسلسلات تاريخية او اجتماعية او كوميدية وعتقد انهم تميزوا فى الكوميدى
وخير مثاال على كده مسلسلات الفنان ايمن زيدان الكوميدية
وانا اؤكد واجزم ان مفيش مسلسل كوميدى مصرى فى جمال وروعة مسلسل جميل وهنا ده غير جمال بطلة المسلسل نورمان اسعدوخفة دمها

والغيرة دى بتبان اكتر عند الممثلات لان الممثلات السوريات جمل منهم الف مرة منغير عمليات تجمل ولا نفخ ولاشد ولا شفط
انا منكرش جمال المصرييات علشان محدش يزعل
نذكر منهم علىسبيل المثال الفنانة سولاف فواخرجى والفنانة جومانة مراد
انا مبقولش ان الدراما المصرية غير مميزة بس زى مبنديها حقها لازم ندى للدراما السورية حقها
وبدل مانغير من بعض ايه المانع ان احنا نشارك بعض علشان نطلع حاجة مميزة
واعتقد ان احنا لازم نبطل الكلام الكتير عن الريادة الاعلامية والعراقة والحضارة
وبعدين انا مش عارف حضارة ايه اللى بيتكلموا عليها انا عمرى ما شفت تمثال للفراعنة وكن واحد شايل كاميرا تصوير ولا تمثال تانى بيقول اكشن
كفاية اوى كده الحضارة عمرها ماكانت ماضى بس
واخيرا اتمنى اشوف الوطن العربى والاسلامى متقدم فى جميع المجالات

stop or my mom will shoot

معلهش لو كنت كاتب العنوان بالانجليزى وده علشان مش ثقافتى انجليزى ولا انا خريج مدارس لغات
اصل العنوان ده اسم فيلم لسلفستر ستالونى باختصار كده من غير تفاصيل لانى مبحبش اتكلم عن حد كتيرا
المهم قصة الفيلم ده ان بطله كان ظابط شرطة وكان ربنا رازقه بام خنقاه ومطهقاه فى عيشته وبتدخل فى كل حاجة فى حياته حتى شغله
بس فى اخر الفيلم انقذته من الموت لما مسكت مسدس وثبتت المجرمين اللى كانوا عايزين يقتلوه

اللى انا عايز اقوله ان مهما الاب والام تدخلو فى حياتنا او اعترضوا على تصرفات احنا شايفين انها صح فده بيكون

من خوفهم علينا وعلى مصلحتنا لكن احنا بيتهيا لنا ان ده تضييق علينا ومن باب السيطرة والتحكم

فلازم نراجع نفسنا ونبطل الكلام اللى بنقوله اعتراضا على تصرفاتهم معانا
ايه يعنى لما ابوك يشيل الريسيفر فى وقت الدراسة؟ مش علشان تذاكر وتنجح
ايه يعنى لما امك تزغق لك قدام اصحابك وقدام اللى يسوى واللى ما يسواش
ويا سلام بقى لو كانت عايزك ماتتاخرش بره البيت عن الساعة12
ولو دخلت البيت متاخر تبقى انت صايع انت واصحابك

هى اينعم حاجات تخنق وتخليك مش طايق نفسك وممكن تخليك تقتل حد من الاتنين
مش ابوك وامك لا طبعا ياتقتل نفسك ياتقتل نفسك برده
وارجع تانى واقولك-على راى سيد مكاوى- ان احنا لازم نحسن معاملتهم ونبرهم نسمع كلامهم

وسبحان الله ان احنا نسمع الكلام بقت اقصى حاجة الاهل يتمنوها مع ان ده الطبيعى

يعنى المفروض نشوف هما عايزين ايه ونعمله قبل ما يطلبوه ولو اعترضنا على حاجة يبقى باسلوب كويس
لكن احنا قلبنا الاية وبقينا نعترض على اى حاجة وباسلوب وحش

ويوم مانسمع الكلام يبقى احنا كده عملنا اللى علينا ورضينا ربنا مع ان ده غلط
مش ده اللى يرضى ربنا لكن اللى يرضيه ان احنا لازم نبرهم حتى لو مشركين
لان ربنا قرن الاحسان الى الوالدين بتوحيده وعبادته

بسم الله الرحمن الرحيم

وقضى ربك الا تعبدوا الا اياه وبالوالدين احسانا

صدق الله العظيم